Shfrytëzimi seksual online i fëmijëve po shënon një rritje shqetësuese në të gjithë Bashkimin Europian, ndërkohë që ekspertët paralajmërojnë edhe një trend tjetër gjithnjë e më të dukshëm: krijimin e materialeve abuzive me inteligjencë artificiale. Volumet e raportimeve dhe të dhënat e identifikimit të faqeve kriminale tregojnë se rreziku po përshkallëzohet si në kanalet tradicionale, ashtu edhe në hapësirat ku përdorimi i AI-së e bën prodhimin më të shpejtë dhe më të vështirë për t’u filtruar.
Sipas të dhënave më të fundit të Observatorit “Better Internet for Kids”, linjat telefonike të bashkëfinancuara nga BE-ja kanë marrë më shumë se 4.5 milionë raportime për përmbajtje potencialisht të paligjshme online gjatë vitit 2025. Pjesa kryesore e këtyre raportimeve lidhej me shkelje të rënda, pasi mbi gjysma e tyre kishin të bënin me materiale të abuzimit ose shfrytëzimit seksual të fëmijëve.
Një tjetër sinjal alarmues vjen nga Internet Watch Foundation, organizata që monitoron dhe identifikon përmbajtje të paligjshme në internet. Të dhënat e saj tregojnë se 63% e URL-ve globale që përmbanin materiale të abuzimit seksual të fëmijëve, gjatë vitit të kaluar, ishin të hostuara në shtetet anëtare të BE-së. Kjo nënkupton se problemi nuk është vetëm i përqendruar, por shtrihet në disa vende anëtare, me pasoja të drejtpërdrejta për sigurinë e fëmijëve në rrjet.
Vërehet gjithashtu një pabarazi mes vendeve. Bulgaria rezulton vendi më problematik në BE për numrin e faqeve kriminale të hostuara, duke regjistruar një rritje të ndjeshme krahasuar me vitin 2024. Pas saj renditen Hollanda dhe Rumania, ku u identifikuan respektivisht 33,788 dhe 21,188 faqe interneti që përmbanin materiale të abuzimit seksual të fëmijëve. Përveç këtyre rasteve, rritje të konsiderueshme janë raportuar edhe në Francë dhe Gjermani gjatë vitit 2025.
AI po i shton abuzimet online: rritje 400% në Europë
Në nivel global, treguesit e përqindjes së faqeve me përmbajtje të tilla vendosin disa vende në krye të listës. Bullgaria mban shifrën prej 28%, SHBA 16% dhe Holanda 11%. Këto numra nxjerrin në pah se as edhe përtej BE-së problemi nuk është ulur, përkundrazi mbetet i pranishëm në shkallë të gjerë dhe me kapacitete të reja për t’u shpërndarë.
Por ajo që po e bën situatën më të rëndë lidhet me mënyrën e krijimit të materialeve. Ekspertët paralajmërojnë se inteligjenca artificiale po përdoret gjithnjë e më shumë për prodhimin e materialeve abuzive. Sipas Internet Watch Foundation, gjatë gjysmës së parë të vitit 2025 është regjistruar një rritje prej 400% e materialeve të abuzimit seksual të fëmijëve të krijuara me AI, të identifikuara në 210 faqe interneti.
Raportet për këtë lloj përmbajtjeje po lidhen gjithnjë e më shumë me praktika të tjera kriminale, si zhvatja seksuale, shantazhi dhe ngacmimet online. Në këtë kontekst, përmasat e problemit nuk kufizohen vetëm te materialet që qarkullojnë, por shtrihen edhe te ndikimi te viktimat. Një në pesë fëmijë, sipas organizatës Missing Children Europe, përjeton ngacmim seksual online. Në Evropën Perëndimore, një në pesë fëmijë deklaron se ka përjetuar ngacmim ose abuzim seksual online para moshës 18-vjeçare. Po ashtu, vetëm gjatë vitit 2025, linjat telefonike për fëmijët e zhdukur në Evropë identifikuan 92 raste ku ngacmimi seksual online lidhej me zhdukjen e një fëmije.
Botuar fillimisht në Bota Sot
