Trajneri i Dinamos, Ilir Daja, ka folur në konferencën për shtyp përpara sfidës së nesërme ndaj Pafos, takim i vlefshëm për raundin e parë “play-off” në Conference League. Tekniku i kryeqytetasve e ka nisur prononcimin duke theksuar se edhe kur një ekip vjen me besim, futbolli i rezervon gjithmonë vështirësitë e veta.
Sipas Dajës, në çdo ndeshje janë të mundura të shihen “të 3-ja rezultatet”, për shkak të karakterit të lojës dhe mënyrës se si mund të zhvillohet një moment i caktuar. Megjithatë, ai ka shprehur bindjen se Dinamo do të tentojë të bëjë diçka në fushën e vet, edhe me mbështetjen e tifozëve. Trajneri kujtoi edhe se në ndeshjen e kaluar, ndaj Audas, në stadium pati një numër më të madh të tifozëve, që solli një energji pozitive.
“Duke e ditur që niveli i vështirësisë është goxha i lartë, ne synojmë t’ua shpërblejmë edhe atyre që do të vijnë në stadium për të parë një ndeshje të bukur”, ka thënë Daja. Ai ka theksuar gjithashtu se skuadra nuk ka mungesa, por ka një “gjendje virusale” që ka prekur jo vetëm lojtarët, por edhe pjesën e stafit. Kjo situatë ka ndikuar në përgatitje në ditët e fundit.
Trajneri nënvizoi se nesër pritet të jenë të gjithë në dispozicion, pavarësisht se ndonjë futbollist mund të ketë minutazh të limituar. Arsyeja lidhet me viruset që po qarkullojnë gjatë kësaj periudhe vere. Daja shtoi se skuadra ka edhe 2-3 lojtarë që kanë qenë me terapi, me qëllim riaftësimin, por synon t’i menaxhojë në një mënyrë sa më të mirë të jetë e mundur.
Po nuk pate një ëndërr, s’ka si ta kthesh në realitet
Në planin taktik, Ilir Daja ka përcaktuar qartë qasjen e ekipit. Ai tha se Dinamo nuk do të qëndrojë në një fazë mbrojtëse, por do të tentojë të sulmojë. Trajneri e formuloi edhe si parim: “në fund fare mbrojtja më e mirë është sulmi”. Për këtë arsye, Dinamo do të kërkojë të ruajë shkallëzimet dhe ekuilibrat gjatë gjithë kohës, ndërsa kundërshtari, Pafos, sipas tij, nuk është vetëm një emër i fortë në letër.
Daja vuri në dukje se Pafos, përveç se ka një ekip që funksionon mirë në grup, ka edhe individë që janë të rrezikshëm dhe kanë cilësi të mira, të afta që në momente të caktuara të bëhen vendimtare. Përballë kësaj, Dinamo do të përpiqet të bëjë lojën e vet, pa u larguar nga ideja e sulmit, por duke ruajtur kujdesin në çdo fazë të ndeshjes.
Në vazhdim, trajneri lidhi përgatitjen me mesazhin motivues që ka dhënë edhe më herët. “Po nuk pate një ëndërr, nuk mund të kërkosh e ta bësh realitet. Unë e kam thënë edhe në ndeshjen e parë, aty ku është më e vështirë, ndoshta është edhe më bukur për të vazhduar përpara.” Kjo qasje, sipas Dajës, shkon paralel me përpjekjen për të marrë maksimumin nga ndeshja e parë.
Ilir Daja foli edhe për aspektin e eksperiencës brenda grupit. Ai tha se një pjesë e mirë e futbollistëve kanë qenë edhe vjet në të njëjtat nivele, çka e bën më të menaxhueshme ruajtjen e ekuilibrave psikologjikë për një takim “play-off”. Në këtë kuadër, trajneri vlerësoi faktin që është kënaqësi të luash në “play off”-in e Ligës së Konferencës dhe se ka shumë futbollistë që nuk e kanë provuar më parë se si është të shkosh deri këtu.
Trajneri shtoi se rruga deri në këtë nivel është fituar me punë dhe rezultate. “Deri sa kemi arritur në këtë nivel, besoj që e kemi merituar”, tha ai, duke përmendur se Dinamo ka pasur ndeshje të forta me Astanën, me Audën apo me Aluminin. Kundërshtari i radhës, Pafos, sipas Dajës, e rrit akoma më shumë vështirësinë, pasi vitin e kaluar ka qenë në grupet e Champions-it. Ai vuri në dukje edhe se koeficienti i ndeshjes lidhet me një nivel të vështirë.
Në përfundim të prononcimit, Ilir Daja u shpreh se Dinamo do të tentojë “gjithçka për gjithçka” për të marrë maksimumin nga ndeshja e parë. Më pas, sipas planit të tij, ekipi do t’i marrë ndeshjet një nga një, në varësi të zhvillimeve në çdo takim. Përballja e së nesërmes ndaj Pafos shënon kështu një fazë të rëndësishme të rrugëtimit europian të Dinamos në Conference League, ku çdo detaj mund të ketë peshë në rezultat.
Botuar fillimisht në Bota Sot
