Barcelona duket se po i hedh një vështrim më serioz akademisë, teksa faza përgatitore po i jep Hansi Flickut mundësinë të testojë lojtarë të rinj. Mes emrave që po shfaqin vlerë dhe po i bëjnë përshtypje stolit, Xavi Espart është kthyer në një nga befasitë më të mëdha të kësaj vere.
Faza përgatitore e skuadrës katalanase ka qenë një moment kyç për Flickun për të parë nga afër disa prej talenteve të La Masias. Në këtë kontekst, Espart ka dalë në pah falë paraqitjeve të tij dhe besueshmërisë që ka treguar në momentet kur i është dhënë mundësia. 19-vjeçari, sipas të dhënave të publikuara nga Marca, shihet si një lojtar i nivelit të lartë.
Një nga arsyet pse Flick e ka vlerësuar Espartin lidhet edhe me atë që ka ndodhur sezonin e kaluar. Atëherë, talenti iu dha mundësia të paraqitej gjashtë herë me ekipin e parë. Ky fakt e ka bërë më të qartë se drejtuesit teknikë kanë parë te i riu potencial real për të konkurruar në skuadrën kryesore, jo vetëm për ta përfshirë si opsion dytësor.
Gjatë kësaj vere, Espart ka vazhduar të lërë mbresa. Ai ka qenë titullar në ndeshjen ndaj Birmingham Cityt, duke marrë rolin kryesor në formacion. Për më tepër, mbrojtësi i djathtë është aktivizuar edhe që nga minuta e parë në përballjet e Barcelonës kundër Udineses dhe Nottingham Forestit, ku ka pasur rast të tregojë aftësitë e tij në skema të ndryshme dhe përballë kundërshtarësh të ndryshëm.
Espart po shfaq fleksibilitet që Flick ta ketë në llogari
Një tjetër moment i rëndësishëm për karrierën e tij është debutimi me ekipin e parë. 19-vjeçari e bëri këtë në mars, në ndeshjen ndaj Neëcastle Unitedit. Pas asaj paraqitjeje, Espart ka treguar se mund të jetë i dobishëm jo vetëm në një rol të caktuar, por të përshtatet me nevojat e skuadrës.
Ndërkaq, aspekti që e bën Espartin veçanërisht interesant për stafit teknik është edhe mundësia për të ndryshuar pozicion. Përveçse luan si mbrojtës i djathtë, ai mund të aktivizohet edhe në mesfushë. Kjo do të thotë se Flicku mund ta ketë në dispozicion një alternativë shtesë në formacion, duke i dhënë më shumë opsione ekipit gjatë ndeshjeve të sezonit.
Profili zyrtar i Barcelonës konfirmon edhe rrugëtimin e tij në klub. Xavi Espart iu bashkua akademisë La Masia në vitin 2015, duke kaluar nëpër grupmoshat e ndryshme të klubit. Tashmë ai është shumë pranë një roli më të rëndësishëm në ekipin e parë, ndërsa paraqitjet e tij gjatë kësaj vere po e rrisin vazhdimisht vëmendjen brenda skuadrës.
Teksa Barcelona vazhdon përgatitjet dhe po ndërton planet për të ardhmen, emri i Espartit është bërë ndër ata që po tërheqin më shumë interes. Flick, nga ana e tij, duket se po e shikon gjithnjë e më seriozisht mundësinë për t’i dhënë hapësirë të riut. Me një histori të qartë në La Masia dhe eksperiencë të fituar në disa ndeshje me ekipin e parë, 19-vjeçari po e vendos veten në qendër të vëmendjes në këtë fazë, si një opsion që mund të vlejë më shumë se sa një provë verore.
Botuar fillimisht në Telegrafi
