Një studim i ri shkencor sugjeron se nuk ekziston një nivel plotësisht i sigurt i konsumimit të alkoolit. Sipas analizës, edhe sasitë e vogla mund të rrisin rrezikun për disa lloje kanceri, duke e bërë çështjen më komplekse sesa udhëzimet tradicionale që flasin për “moderim”. Gjetjet trajtohen nga Science Alert dhe vijnë si rezultat i një shqyrtimi të gjerë të literaturës shkencore.
Studimi është udhëhequr nga studiues të Universitetit të Washingtonit në SHBA. Për analizën janë marrë në konsideratë gjithsej 843 kërkime të publikuara në periudhën nga viti 1963 deri në vitin 2023. Hetimi i fokusuar ka shqyrtuar lidhjen mes konsumimit të alkoolit dhe 20 problemeve të rëndësishme shëndetësore, për të parë se si ndryshon rreziku në varësi të sasisë së pijes alkoolike.
Rezultatet treguan se konsumimi i alkoolit lidhej me rrezik më të lartë për të gjitha 10 llojet e kancerit të studiuara. Studiuesit theksojnë se rreziku rritej me rritjen e sasisë së alkoolit, por një gjetje po ashtu e rëndësishme është se edhe më pak se një pije në ditë mund të lidhej me rrezik më të lartë për disa forma të kancerit. Kjo nënkupton se “zero rrezik” nuk shfaqet në të dhënat e analizës.
Çdo nivel alkooli lidhet me rrezik të rritur për kancer
Ndër llojet e kancerit që u identifikuan në studim janë kanceri i fytit, zorrës së trashë, ezofagut, gjirit, mëlçisë, pankreasit dhe prostatës. Gjetjet vendosin një lidhje të qartë mes konsumimit të alkoolit dhe rritjes së rrezikut për këto sëmundje, duke i shoqëruar rezultatet me një mesazh të drejtpërdrejtë: sa më shumë alkool, aq më i lartë rreziku. Në këtë kontekst, studimi përmend se provat për kancerin janë “të qëndrueshme” dhe “të qarta”.
Emmanuela Gakidou, nga Universiteti i Washingtonit, e ka përshkruar mënyrën si shkenca mbi alkoolin dhe shëndetin është komplekse, por ka nënvizuar se për kancerin provat janë të qarta: rreziku rritet me çdo nivel të konsumimit të alkoolit. Kjo pikë e bën dallimin mes asaj që shihet te kanceri, ku lidhja del më e fortë, dhe te fusha të tjera të shëndetit ku rezultatet mund të jenë më të paqarta.
Përtej kancerit, studimi lidhi edhe konsumimin e alkoolit me rrezik më të lartë për disa probleme të tjera shëndetësore. Në analizë përmendet rrezik i rritur për pankreasit, cirrozë dhe sëmundje të tjera kronike të mëlçisë. Po ashtu, studiuesit gjetën lidhje mes alkoolit dhe infeksioneve të rrugëve të poshtme të frymëmarrjes, si dhe me tuberkulozin.
Ndërkohë, rezultatet nuk ishin njësoj të qarta për të gjitha kategoritë e sëmundjeve. Për disa çështje të lidhura me zemrën, metabolizmin dhe trurin, gjetjet u shfaqën më pak të njëtrajtshme. Disa studime sugjeruan se konsumimi i ulët ose i moderuar mund të lidhej me rrezik më të ulët për diabetin e tipit 2 dhe sëmundjen e Alzheimerit, por këto përfitime të mundshme, sipas analizës, bëhen më të dobëta ose zhduken me rritjen e konsumit të alkoolit. Për disa sëmundje kardiometabolike dhe forma të demencës, përmendet se studimet sugjerojnë ulje të vogël të rrezikut në nivele të ulëta, por lidhjet dobësohen dhe përmbysen kur alkooli konsumohet në sasi më të larta.
Botuar fillimisht në Koha.net
