Koalicioni i OJQ-ve për Mbrojtjen e Fëmijëve – KOMF dhe Asociacioni i Qendrave për Punë Sociale i janë drejtuar me një kërkesë të përbashkët Kryeministrit të Republikës së Kosovës, Albin Kurti, për sigurimin e financimit të qëndrueshëm për shërbimet sociale. Në kërkesë parashtrohet edhe themelimi i një mekanizmi të veçantë, të quajtur Grant Specifik për Shërbimet Sociale, si prioritet për t’u përfshirë në Buxhetin e vitit 2027.
Sipas të dhënave të paraqitura, financimi i mbrojtjes sociale në Kosovë mbetet i përqendruar kryesisht në transfere monetare. Në të njëjtën kohë, shërbimet sociale vazhdojnë të marrin një pjesë shumë të vogël të buxhetit të sektorit. Në vitin 2024, Kosova shpenzoi rreth 854.6 milionë euro për mbrojtjen sociale, por vetëm 1.6% e kësaj shume u dedikua për shërbimet sociale. Ky disproporcion, theksohet në kërkesë, tregon nevojën për një qasje më të balancuar të financimit, duke rritur investimet në parandalim dhe në shërbime profesionale për fëmijët dhe familjet.
Granti specifik do ta forcojë financimin e shërbimeve sociale
Organizatat që kanë paraqitur kërkesën theksojnë se në vijën e parë të ofrimit të shërbimeve sociale qëndrojnë 38 Qendra për Punë Sociale dhe rreth 50 organizata të licencuara. Megjithatë, këto institucione përballen me sfida të shumta që lidhen si me burimet njerëzore, ashtu edhe me financimin dhe kushtet e punës. Njoftimi nënvizon se në komunat e mëdha, një zyrtar i QPS-së menaxhon rreth 350 lëndë aktive gjatë një viti, çka e bën të vështirë përgjigjen e nevojave reale në terren.
Një tjetër çështje e ngritur lidhet me funksionimin e Organet të Kujdestarisë. Në shumicën e komunave, këto organe nuk janë të kompletuara me pesë profesionistët e kërkuar me ligj. Kjo sjell vështirësi shtesë në proceset që lidhen me mbrojtjen e fëmijëve dhe mbështetjen e familjeve në situata të ndjeshme, duke e bërë edhe më të nevojshme një financim më të qëndrueshëm.
Po ashtu, kërkesa përfshin edhe shqetësimin se organizatat e licencuara rrezikojnë ndërprerjen e shërbimeve për shkak të mungesës së financimit të qëndrueshëm. Në këtë kontekst, propozimi kryesor është krijimi i Grantit Specifik për Shërbimet Sociale si mekanizëm për financim afatgjatë, transparent dhe të bazuar në nevojat e komunave.
Njoftohet se aktualisht për shërbimet sociale ndahen rreth 20 milionë euro në vit. Megjithatë, sipas analizave financiare, nevojiten edhe 16 milionë euro shtesë, në mënyrë që të sigurohet financimi i përgjithshëm prej 36 milionë eurosh në vit. Kjo shumë përmendet si rreth 0.4% e buxhetit të Kosovës. Rritja synon që shërbimet të mos mbeten të kufizuara, por të zhvillohen më gjerësisht, veçanërisht në pjesët që kanë nevojë më të madhe për mbështetje profesionale.
Në kërkesë, KOMF dhe Asociacioni i Qendrave për Punë Sociale propozojnë që Qeveria e Kosovës të: alokojë buxhet për punësimin e 200 zyrtarëve të rinj të shërbimeve sociale në QPS, si dhe për përmirësimin e infrastrukturës dhe kushteve të punës; të rrisë buxhetin e dedikuar për thirrjen publike për organizatat e licencuara për ofrimin e shërbimeve sociale, me qëllim të sigurimit të qëndrueshmërisë së këtyre shërbimeve dhe zgjerimit të mbështetjes për fëmijët dhe familjet në nevojë; të miratojë Grantin Specifik për Shërbimet Sociale në kuadër të Projektligjit për Financat e Pushtetit Lokal; dhe të finalizojë kostimin dhe formulën e alokimit të grantit, bazuar në nevojat dhe kapacitetet e komunave.
Botuar fillimisht në Telegrafi
