Aston Martin, i njohur kryesisht për makinat sportive luksoze, po synon të zgjerojë praninë e tij edhe në dy rrota. Kompania britanike ka prezantuar motoçikletën e parë të saj të destinuar për qarkullim në rrugët publike, modelin AMB 002 Roadster. Ky lançim vjen përmes një bashkëpunimi me prodhuesin Brough Superior, duke e kthyer një projekt deri më tani eksperimental në një produkt që lidhet drejtpërdrejt me përdorimin e përditshëm.
AMB 002 është një hap i rëndësishëm krahasuar me dy modelet e mëparshme të linjës AMB: AMB 001 dhe AMB 001 Pro. Këto versione ishin të dizajnuara vetëm për pista, ndërsa AMB 002 është prodhuar për herë të parë me fokus te rruga. Kjo do të thotë se specifikat e saj, por edhe filozofia e ndërtimit, janë orientuar që motoçikleta të përballojë realitetin e përdorimit në qarkullim.
Aston Martin AMB 002 sjell në rrugë luksin e dy rrotave
Prodhimi i AMB 002 do të jetë i kufizuar në vetëm 300 ekzemplarë. Secila motoçikletë, sipas planeve të prezantuara, do të montohet me dorë. Ky detaj e vendos modelin në të njëjtin segment ekskluziviteti si makinat për të cilat Aston Martin njihet, duke ruajtur idenë e kujdesit maksimal në çdo njësi. Në fakt, lidhja me markën është e qartë edhe në mënyrën si është konceptuar dizajni dhe komponentët kryesorë.
Studioja e dizajnit e Aston Martinit ka marrë pjesë drejtpërdrejt në krijimin e motoçikletës. Në pamje, AMB 002 ruan gjuhën estetike të makinave luksoze të markës. Motoçikleta ka depozitë karburanti dhe pjesë anësore të karrocerisë të prodhuara me fibra karboni. Në pjesën e pasme, dritat e holla janë frymëzuar nga modelet Vulcan, Valkyrie dhe Valhalla, ndërsa dy daljet ovale të shkarkimit të gazrave të kujtojnë dizajnin e disa makinave të markës si Vanquish, DB12 S dhe DBX S.
Edhe elementë të veçantë funksionalë kanë reflektuar këtë lidhje me botën e Aston Martin. Butoni i ndriçuar i ndezjes dhe ulësja prej lëkure e punuar me dorë janë konceptuar si detaje që shkojnë paralel me standardin premium të automjeteve luksoze të markës britanike. Këto zgjidhje i japin AMB 002 një identitet të veçantë, ku teknologjia dhe materiali bashkëjetojnë me një pamje të rafinuar.
Përveç dizajnit, AMB 002 nuk është vetëm një eksperiment stili. Brough Superior ka zhvilluar për motoçikletën një motor të ri V2, me ftohje me ujë dhe vëllim prej 1,083 centimetra kub. Sistemi i fuqisë e çon motorin në 130 kuaj fuqi, ndërsa çift rrotullues arrin 110 Nm. Pesha e motoçikletës është raportuar vetëm 190 kilogramë, një shifër që e ndihmon performancën dhe manovrueshmërinë.
Struktura e AMB 002 bazohet në një kornizë titani, e përpunuar nga një pjesë e vetme materiali, me peshë vetëm pesë kilogramë. Për të ruajtur balancën mes forcës dhe lehtësisë, fibrat e karbonit janë përdorur në depozitën e karburantit dhe në pjesë të karrocerisë. Shpërndarja e masës është vendosur në raportin 50:50. Për sa i përket drejtimit, prodhuesit premtojnë një kombinim të saktësisë, manovrueshmërisë dhe stabilitetit në shpejtësi të larta, duke theksuar se edhe pozicioni i drejtuesit është relativisht i drejtë.
Pavarësisht materialeve dhe konstruksionit ekzotik, AMB 002 është zhvilluar nga fillimi për përdorim në rrugë. Prodhimi mbetet i kufizuar në 300 njësi dhe dërgesat e para parashikohet të nisin në tremujorin e tretë të vitit 2027. Për sa i përket çmimit, raportohet se çmimi fillestar është 120 mijë euro, pa përfshirë taksat dhe shpenzimet e transportit. Me këto shifra dhe detaje, Aston Martin dhe Brough Superior duket se po e çojnë një hap të ri, duke e çuar identitetin e markës nga pista e makinave drejt një produkti të destinuar për rrugë.
Botuar fillimisht në Telegrafi
