Ministri i Jashtëm i Shqipërisë, Ferit Hoxha, ka komentuar sërish marrëveshjen në parim që parashikon hapjen e një konsullateje serbe në Shkodër dhe, në të njëjtën logjikë, një konsullate shqiptare në Luginën e Preshevës. Gjatë kësaj bisede, Hoxha ka theksuar se asnjë veprim diplomatik nuk nënkupton ndryshim qëndrimi për Kosovën, por duhet të shihet si çështje e interesit shtetëror dhe funksionimit të marrëdhënieve mes vendeve.
Gjatë një interviste për “Top Channel”, Hoxha ka thënë se Shqipëria nuk do të pranonte kurrsesi një prani diplomatike që cenon apo kërcënon interesat e saj. Sipas tij, angazhimi i mundshëm me Serbinë në nivel institucional nuk e luhat fare pozicionin e Shqipërisë për Kosovën dhe parimet bazë të saj, përfshirë pavarësinë, sovranitetin dhe integritetin territorial.
Ministri ka argumentuar se Shqipëria nuk e relativizon politikën e Beogradit ndaj Kosovës, ndërsa angazhimi diplomatik nuk duhet të keqinterpretohet si shenjë pandjeshmërie. “Angazhimi diplomatik me Serbinë nuk nënkupton në asnjë mënyrë dhe në asnjë rrethanë pandjeshmëri ndaj Kosovës, aq më pak relativizim të politikës së Beogradit ndaj saj. Qëndrimi i Shqipërisë për pavarësinë, sovranitetin, integritetin territorial, mëvetësinë dhe zhvillimin si dhe perspektivën euroatlantike të Kosovës dhe mbështetjen e pakursyer të shtetit shqiptar, ka qenë dhe mbetet i qartë, i qëndrueshëm dhe i pandryshueshëm”, ka theksuar Hoxha.
Diplomacia reciproke s’mund të ndryshojë qëndrimin për Kosovën
Në vijim të argumentit të tij, Hoxha ka thënë se kjo dakordësi synon ta afrojë shtetin shqiptar me shqiptarët jashtë kufijve, duke i dhënë vlerë të veçantë pyetjes: çfarë përfiton realisht Shqipëria me një konsullatë në Luginën e Preshevës. Ai ka vënë në dukje se debati publik për këtë çështje, sipas tij, është zhvilluar në mënyrë që shpesh ka shmangur interesat konkrete të shqiptarëve, duke e zhvendosur fokusin te pretendime të “interesave të supozuara” të Serbisë.
Hoxha ka argumentuar se një qasje ku Shqipëria kërkon të hapë konsullatën pa pranuar që edhe Serbia të ketë mundësinë e saj në Shqipëri, nuk krijon zgjidhje reale. Ai ka shtuar se një propozim i tillë mund të duket “patriot” në rrjetet sociale, por nuk garanton asnjë rezultat konkret për shqiptarët e Luginës. Në këtë kuadër, ministri ka ngritur edhe dyshimin se një mënyrë e tillë diskutimi tregon mosnjohje të thellë të mënyrës se si funksionon diplomacia dhe marrëdhëniet mes shteteve.
“Kushdo që pretendon se Shqipëria duhet ta hapë Konsullatën e saj në Serbi, por pa pranuar që Serbia të ketë të njëjtën mundësi në Shqipëri, nuk propozon një zgjidhje reale dhe flet në hava. Një qasje e tillë mund të tingëllojë patriotike në rrjetet sociale, por nuk prodhon asnjë rezultat konkret për shqiptarët e Luginës. Në rastin më të mirë, ajo dëshmon një mosnjohje të thellë të mënyrës se si funksionojnë diplomacia dhe marrëdhëniet ndërmjet shteteve. Në rastin më të keq, ajo është një përpjekje e vetëdijshme për të penguar një objektiv që i shërben drejtpërdrejt interesit kombëtar”, ka deklaruar Hoxha.
Ministri ka vijuar më tej duke sqaruar se madhësia e komunitetit jashtë kufijve nuk është arsyeja e vetme për hapjen e një konsullateje. Ai ka theksuar se vendimet e tilla mbështeten edhe në çështje ekonomike, kulturore, turistike dhe në interesat strategjike që lidhen me marrëdhëniet mes vendeve. “Unë kam detyrimin të mbroj interesat e Shqipërisë. Serbia, ashtu si çdo shtet tjetër, bën të njëjtën gjë për interesat e saj”, ka shtuar Hoxha, duke nënvizuar se logjika e reciprocitetit është pjesë e qasjes së diplomacisë mes shteteve.
Botuar fillimisht në Koha.net
