Zyra Kombëtare e Auditimit ka publikuar raportin e saj për Ministrinë e Shëndetësisë, ku mes gjetjeve kryesore del se autoambulancat nuk ishin pranuar në përputhje me standardet kontraktuale. Në dokument, audituesit evidentojnë se Ministria kishte marrë automjete që fillimisht ishin të tipit furgon, të cilat më pas u modifikuan në autoambulanca, por që, sipas verifikimeve, nuk posedonin certifikatat që kërkoheshin sipas specifikimeve teknike.
Sipas raportit, gjatë vitit 2025 Ministria e Shëndetësisë ishte furnizuar me 20 autoambulanca me vlerë të përgjithshme 1,495,800 euro. Në specifikat teknike, autoambulanca ishte përcaktuar si produkt përfundimtar, ndërsa operatori ekonomik kishte ofertuar automjete të tipit furgon. Më tej, këto automjete ishin modifikuar që të paraqiteshin si autoambulanca, megjithatë automjetet e pranuara nuk kishin certifikatat e kërkuara sipas specifikimeve teknike.
Auditimi thekson se, për shkak të kësaj situate, komisioni pranues kishte konsideruar të mjaftueshme vetëm aprovimin e lëshuar nga Qendra e Automjeteve të Kosovës, pa kryer verifikime shtesë për përmbushjen e të gjitha kërkesave teknike. Kjo, sipas gjetjeve të ZKA-së, ka ndikuar në cenimin e përputhshmërisë së specifikave dhe në sigurimin e standardeve të kërkuara për këto autoambulanca.
Autoambulancat u modifikuan, por certifikimi teknik mungoi
Në tetor, Ministria njoftoi se do të nisë shpërndarjen e autoambulancave nëpër komuna. Në atë kuadër, ministri në detyrë i shëndetësisë, Arben Vitia, bëri të ditur se gjatë vitit 2025 do të shpërndaheshin gjashtë autoambulanca në qershor dhe tetë të tjera në nëntor. Shpërndarja u planifikua si pjesë e zgjerimit të kapaciteteve për shërbimet urgjente, duke i adresuar nevojat e institucioneve shëndetësore në nivel lokal.
Mirëpo, te ato autoambulanca që u dërguan në Qendrën Urgjente të Prishtinës, auditori ka konstatuar probleme. Raporti i Zyrës Kombëtare të Auditimit për Ministrinë e Shëndetësisë, ndër të tjera, evidenton se autoambulancat u pranuan jashtë standardeve kontraktuale. Në verifikimet e kryera në prill, kur auditimi u realizua në Qendrën Urgjente të kryeqytetit, u vërejtën edhe shenja të dëmtimit të elementeve të jashtme të automjeteve.
Audituesit raportuan se stema, shënjimet dhe skema e ngjyrave kishin filluar të dëmtohen pesë muaj pas përdorimit. Përveç këtyre vërejtjeve vizuale, në raport u theksua edhe se specifikat tjera nuk kishin qenë në linjë me standardet e kërkuara. Konkretisht, gjatësia e ndarjes së pacientit ishte kërkuar me minimum 3100 mm, ndërsa sipas matjeve rezultoi 2800 mm. Po ashtu, barela e ambulancës me rrota në katalog ishte ofruar me dimensione minimale 1930x600x210 mm, ndërsa sipas matjeve të bëra në terren rezultoi 1750 mm.
Sipas raportit, pranimi i këtyre furgonëve që më pas u kthyen në autoambulanca, pa certifikim që të plotësonte standardet dhe specifikat teknike, cenon përputhshmërinë e kërkesave dhe sigurinë. Në anën tjetër, një element tjetër i rëndësishëm i ngritur në dokument është fakti se procedurat e verifikimit pas modifikimit nuk ishin kryer në mënyrë të plotë për të siguruar se automjetet i përmbushin kriteret përfundimtare të kërkuara.
Siç raportohet, e njëjta vazhdon të jetë në shërbim të qytetarëve. Ndërkaq, gjatë së mërkurës, nga Qendra e Automjeteve të Kosovës nuk ishin dhënë informacione nëse të gjitha 20 autoambulancat i janë nënshtruar kontrolleve teknike. Ndërkohë, raporti i ZKA-së mbetet dokumenti që i përmbledh të gjeturat rreth pranimit, modifikimeve dhe mangësive në dokumentacionin dhe specifikat teknike të automjeteve të përdorura për urgjencat shëndetësore./Tv Dukagjini
Botuar fillimisht në Telegrafi
