Ekspozita “Frida: The Making of an Icon” po ngjall interes të jashtëzakonshëm edhe para se të hapë dyert për publikun. Veprat e piktores meksikane Frida Kahlo kanë arritur të shesin paraprakisht 41 mijë bileta për prezantimin që do të zhvillohet në “Tate Modern” në Londër, duke vendosur një rekord të ri për këtë institucion.
Sipas të dhënave të publikuara nga muzeu, ky shifër i kalon ndjeshëm 32 mijë biletat që ishin shitur paraprakisht për ekspozitën e David Hockneyt në vitin 2017. Rekordi i ri e vendos ekspozitën për Kahlon si një nga ngjarjet më të ndjekura në programin e “Tate Modern”, pikërisht në fazën kur biletat janë shitur ende përpara nisjes zyrtare të shfaqjes.
Ekspozita pritet të jetë e hapur për publikun nga 25 korriku deri më 3 janar të vitit të ardhshëm. Muzeu e ka prezantuar këtë projekt si ekspozitën e parë madhore që shqyrton mënyrën se si Kahlo u shndërrua në një “ikonë globale”, si dhe si u shndërrua në një ndikim për breza të tërë artistësh.
41 mijë bileta të shitura paraprakisht: Frida Kahlo rikthehet në qendër të vëmendjes në Tate Modern
“Frida: The Making of an Icon” është organizuar në bashkëpunim me Muzeun e Arteve të Bukura të Houstonit. Programi do të përfshijë më shumë se 30 vepra të artistes, të shoqëruara edhe me fotografi dokumentare, objekte personale dhe punime nga një numër artistësh që, sipas organizatorëve, pasqyrojnë ndikimin e thellë që Kahlo ka pasur te brezat e mëvonshëm.
Ndër veprat që priten të jenë në mesin e ekspozitës përmenden disa nga autoportretet më ikonike të Kahlos. Në listë janë “Self-Portrait (With Velvet Dress)” nga viti 1926 dhe “Self-Portrait with Loose Hair” nga viti 1938. Përmes këtyre punimeve, muzeu thotë se artistja ka përqafuar trashëgiminë e saj meksikane, identitetin e saj queer, idealet feministe dhe përvojën e saj si grua me aftësi të kufizuara.
Në ekspozitë do të shfaqen edhe vepra të Diego Rivera, bashkëshortit të saj. Rivera, i njohur si një nga muralistët më të mëdhenj meksikanë dhe si një ikonë ndërkombëtare, do të përfaqësohet me punime si portreti i Frida Kahlos i realizuar rreth vitit 1935. Përfshirja e tij i jep ekspozitës një dimension shtesë, duke lidhur botën artistike të Kahlos me atë të një prej figurave më të njohura të artit monumental meksikan.
Pavarësisht se Kahlo kundërshtonte të etiketohej si surrealiste, artistët e kësaj rryme e përqafuan atë. Themeluesi i surrealizmit, André Breton, e ka quajtur Kahlon “një surrealiste e krijuar nga vetvetja”. Një hap i rëndësishëm në këtë histori lidhet edhe me Galerinë “Julien Levy” në Neë York, e cila në vitin 1938 organizoi ekspozitën e saj personale për Kahlon, duke e pozicionuar artistën në skenën amerikane të asaj kohe.
Më pas, Breton e ftoi të ekspozonte edhe në Paris. Në këtë periudhë, shteti francez bleu autoportretin e saj të vitit 1938, “The Frame”. Ekspozita do ta vendosë këtë vepër në të njëjtin kontekst me punime të tjera të përmendura nga “Tate Modern”, si “Diego and Frida” (1929), “Survivor” (1938), “Memory (The Heart)” (1937) dhe “Girl with a Death Mask” (1938). Në total, projekti synon të tregojë, përmes veprave dhe dokumenteve shoqëruese, se si Kahlo u kthye në figurë që tejkaloi kohën e vet.
Vetëm pak ditë para hapjes, muzeu ka nënvizuar se publikun e pret një përzgjedhje që shkon përtej autoportreteve klasike, duke shtuar edhe elemente personale dhe interpretimet e artistëve të tjerë. Catherine Wood, drejtoreshë e përkohshme e “Tate Modern”, ka thënë se janë “vërtet të mahnitur” nga numri i biletave të shitura paraprakisht.
Botuar fillimisht në Koha.net
