Në moshën 18-vjeçare, Lamine Yamal po shkon drejt Kupës së Botës me një përgjegjësi që zakonisht i takon lojtarëve më me përvojë. Spanja, e cila synon të kërkojë sërish titullin global, e sheh Yamalin si figurën që mund ta mbajë skuadrën në nivele të larta në një turne ku çdo detaj ka peshë.
Talenti i sulmuesit spanjoll ka tërhequr vëmendje prej kohësh. Në vitet e fundit, ai ishte yll i madh i “La Rojas”, duke u kthyer në një nga emrat që tërheqin jo vetëm tifozë, por edhe interes jashtë fushës. Performancat e tij kanë ndihmuar që si Spanja, ashtu edhe Barcelona, të ruajnë ritëm dhe të ecin përpara në momentet më të rëndësishme.
Rreth Yamali ka pasur edhe episode që kanë bërë bujë në Spanjë. Një nga rastet lidhet me festën e titullit të Barcelonës, kur ai valëviti flamurin e Palestinës gjatë festimeve. Një tjetër çështje që u përfol gjerësisht ishte kritika ndaj tij pasi punësoi xhuxhë si argëtues për festën e ditëlindjes së 18-të.
Por ajo që e ka vënë më shumë në pikëpyetje pjesëmarrjen në Botëror ka qenë një problem fizik. Vetëm disa javë para fillimit të Kupës së Botës, Yamal u lëndua. Pjesëmarrja e tij në turne ishte në dyshim në atë kohë, ndërsa më pas është konfirmuar se ai do të jetë pjesë e Spanjës në Botëror.
Botërori 2026 e gjen Yamalit në rolin e liderit të ri të Spanjës
Për Yamalin, kjo është hera e parë në Botëror. Ai shihet si një pasardhës i Lionel Messit te Barcelona, çka e ka bërë pritshmërinë edhe më të lartë. Shumë presin që ai të shpërthejë në skenën ndërkombëtare të futbollit dhe të shkëlqejë në Botërorin që fillon në SHBA, Kanada dhe Meksikë, në ditët që vijnë.
Fjalët e tij së fundi kanë qenë të qarta: “Më në fund ka ardhur koha”. Përzgjedhësi Luis de la Fuente nuk ka hezituar ta përfshijë Yamalin në skuadër, edhe pse nuk kishte garanci se talenti do të ishte 100 për qind i gatshëm në fillim të Botërorit. Vetë periudha e dëmtimit ka qenë në prill, kur Yamal lëndoi hamstringun e këmbës së majtë gjatë kohës që ishte duke luajtur për Barcelonën.
Selektori spanjoll ka theksuar se Yamal është mjaft i pjekur si lojtar, por se ende nuk është e mundur të kuptohet potenciali i plotë i tij në këtë fazë. De la Fuente ka bërë të qartë se duhet dhënë kohën e nevojshme, sidomos tani që lojtari vjen nga një lëndim. Në të njëjtën linjë, ai ka nënvizuar se presioni i mediave mbi Yamalin është i lartë, jo vetëm për faktin se ai ndiqet kudo, por edhe sepse në Spanjë tashmë është kthyer në referencë.
Ndërkohë, Yamali ka deklaruar se është mësuar me presionin. Ai është pjesë e futbollit spanjoll prej kohësh: debutoi me Barcelonën në moshën 15-vjeçare dhe u bë më i riu që luajti në ligën spanjolle për klubin katalonjas. Ai ka regjistruar katër edicione në La Liga dhe në edicionin që përfundoi është shpallur më i miri i ligës spanjolle. Teksa Botërori nis të enjten, ylli i ri i Spanjës pritet të përballojë sfidat e turneut të parë botëror, me synimin që të përmbushë pritshmëritë pa u rënduar nga pritjet e jashtme.
Botuar fillimisht në Koha.net
