Sot shënohen 28 vjet nga rënia e Komandantit të Ushtrisë Çlirimtare të Kosovës, Ismet Jashari, i njohur edhe si “Komandant Kumanova”. Figura e tij lidhet me fazën vendimtare të luftës, kur UÇK-ja po përballej me përpjekje të rrepta të forcave armike për depërtim drejt zonave ku ishte përqendruar rezistenca.
Ismet Jashari lindi më 16 prill 1967 në fshatin Orizare të Kumanovës. Ai ishte i biri i Jashar Jasharit dhe i nënë Nuries. Mësimet fillore i mori në vendlindje, ndërsa në vitin 1982 u regjistrua në Gjimnazin e Kumanovës. Krahas rrugës arsimore, ai u shqua si i përkushtuar në kauzën për liri, duke u radhitur ndër organizatorët dhe veprimtarët që u angazhuan për krijimin e strukturave mbështetëse për luftën.
Ndër kontributet e hershme të Ismet Jasharit ishte pjesëmarrja në themelimin e fondit “Vendlindja thërret”. Ky fond u shndërrua në një bazë të rëndësishme për logjistikën dhe financimin e luftës së Ushtrisë Çlirimtare të Kosovës. Më vonë, pas epopesë së Prekazit, më 5, 6 dhe 7 mars të vitit 1998, Ismet Jashari zhvilloi përgatitjet e fundit për të hyrë në Kosovë dhe për të marrë detyra në terren.
Më 11 mars të po atij viti, ai, së bashku me Fehmi Lladrovcin, Xhevë Lladrovcin, Mirush Dakën, Bekim Berishën, Agim Bajramin dhe të tjerë, hyri në zonat ku po vepronte Ushtria Çlirimtare e Kosovës. Në këtë rrugëtim, ata arritën në Likoc të Drenicës, ku asokohe ndodhej baza më e rëndësishme e UÇK-së. Pas vendimeve të brendshme të strukturave ushtarake, Ismet Jashari u caktua me detyrë ushtarake në zonën e Llapushës, me synim që të bëhej zgjerimi dhe konsolidimi i radhëve të ushtrisë çlirimtare.
Rezistenca në Luzhnicë mban peshën e fundit të Ismet Jasharit
Në vazhdim të ngjarjeve, më 23 gusht 1998, pasi ushtria armike kishte ndërmarrë të gjitha masat për të depërtuar drejt Kleçkës, ku gjendej edhe Shtabi i Përgjithshëm i Ushtrisë Çlirimtare të Kosovës, Ismet Jashari organizoi rezistencën në pikën e tij të pamposhtur, në Bajrak të Luzhnicës. Ky ishte një moment kyç, ku veprimi i tij synonte të pengonte avancimin e kundërshtarit dhe të ruante qasjen e mbështetjes për strukturat kryesore të UÇK-së.
Po më 24 gusht, në mbrëmje, luftëtarët e lirisë kishin depërtuar thellë në pozicionet armike, duke u shkaktuar dëme në njerëz dhe në teknikë lufte. Në atë përballje, luftëtarët militantë Gani Kastrati dhe Afrim Buçaj nuk kishin arritur të tërhiqeshin. Në mëngjesin e hershëm të 25 gushtit, Ismet Jashari kundërsulmoi befasishëm, në përpjekje për t’i marrë trupat e ushtarëve të rënë. Pas disa orësh luftimesh, në një distancë të afërt, në altarin e atdheut, në Luzhnicë, ra trimi ndër më të dalluarit e Ushtrisë Çlirimtare të Kosovës, Ismet Jashari – Komandant Kumanova. Në të njëjtin betejë ranë edhe Nuhi Mazreku dhe Habib Zogaj.
Sot, trupi i dëshmorit Ismet Jashari prehet në kompleksin e Varrezave të Dëshmorëve në Kleçkë, ku pushojnë edhe trupat e 66 dëshmorëve të tjerë, të Brigadës 121, Ismet Jashari–Kumanova. Emri i tij vijon të përmendet si pjesë e historisë së rezistencës dhe organizimit në luftë, ndërsa përvjetori i 28-vjetorit shërben si kujtesë për sakrificën e bërë në kohën kur vendosja e fatit të Kosovës varej nga qëndresa e përgjithshme.
Botuar fillimisht në Bota Sot
